15-sentabr soat 10:00 da Jizzax shahridagi “O‘rda” ekologik bog‘ida O‘rmon xo‘jaligi ilmiy-tadqiqot instituti ishlanmalarini amaliyotga tadbiq etishga bag’ishlangan ko‘rgazmali yarmarka ochildi.

Tadbir Ekologiya, atrof-muhitni muhofaza qilish va iqlim o‘zgarishi vazirligi, Markaziy Osiyo atrof-muhit va iqlim o‘zgarishini o‘rganish universiteti (Green University) va O‘rmon xo‘jaligi ilmiy-tadqiqot instituti tomonidan tashkil etilmoqda. 

Yarmarkada Oʼrmon xoʼjaligi ilmiy-tadqiqot institutida soʼnggi 5 yil davomida ishlab chiqilgan ilmiy ishlanmalar namoyish etiladi. Yarmarkaga tashrif buyurganlar yangi pista navlari va resurstejamkor koʼchat ekish oʼrmon agregat mashinalariga olingan patentlar, innovatsion usulda ekilgan noyob va qimmatli daraxt-buta koʼchatlari, urugʼlari, dorivor oʼsimliklar, duragay terak navlari va boshqa mahsulotlar bilan tanishish imkoniga ega bo‘lishadi. 

Shuningdek, viloyatlarda koʼchatchilik, yongʼoqchilik (pista, bodom plantatsiyalari) hamda dorivor oʼsimliklarni yetishtirish bilan shugʼullanuvchi subyektlar (fermer xoʼjaliklari, tadbirkorlar, koʼkalamzorlashtirish va obodonlashtirish korxonalari)ga yaratilgan ilmiy ishlanmalarning afzalliklari, ustunliklari, ularning iqtisodiy samaradorliklari haqida ma'lumot beriladi. 

Yarmarka yakunida ishlab chiqaruvchi subyektlar oʼrtasida o’zaro manfaatli shartnomalar imzolanishi kutilmoqda.

Ma'lumot uchun, yarmarka 22-oktabr kuni Qoraqalpog‘iston Respublikasining Nukus shahrida ham o‘tkaziladi.