Жорий йилнинг апрел-май ойларида Хитойнинг Кунминь шаҳрида Биологик хилма-хиллик тўғрисидаги Конвенция томонларининг 15-Конференцияси бўлиб ўтади. Унда Ўзбекистон Республикаси вакилларининг иштироки режалаштирилмоқда.

Шу муносабат билан куни кеча Давлат экология қўмитаси раиси ўринбосари Ж. Казбековнинг Биологик хилма-хиллик тўғрисидаги Конвенция Ижрочи котиби ўринбосари Девид Купер билан видеоконференц-алоқа шаклидаги музокаралари ташкил этилди.

Онлайн учрашув Ўзбекистоннинг Нью-Йоркдаги доимий ваколатхонаси раҳбари Б. Ибрагимов иштирокида бўлиб ўтди.

Музокаралар давомида хорижий томонга Ўзбекистон Ҳукумати томонидан биохилма-хилликни асраш, муҳофаза этиладиган табиий ҳудудларни кенгайтириш ва бошқариш, Орол денгизи қуриган тубида ўрмонзорлар барпо этиш каби масалалар юзасидан фикр алмашилди. Муҳокамалар давомида томонлар Биологик хилма-хиллик тўғрисидаги Конвенция билан ҳамкорликда амалга ошириладиган чора-тадбирлар ва унинг тадбирларида Ўзбекистон вакилларининг иштироки масалаларига тўхталиб ўтилди.

Шунингдек, Конвенция томонларининг кейинги Конференцияларидан бирини ҳамда бошқа органларининг йиғилишларини Ўзбекистонда ўтказиш имконияти муҳокама қилинди.

Давлат экология қўмитаси
Матбуот хизмати