Joriy yilning aprel-may oylarida Xitoyning Kunmin shahrida Biologik xilma-xillik to‘g‘risidagi Konventsiya tomonlarining 15-Konferentsiyasi bo‘lib o‘tadi. Unda O‘zbekiston Respublikasi vakillarining ishtiroki rejalashtirilmoqda.

Shu munosabat bilan kuni kecha Davlat ekologiya qo‘mitasi raisi o‘rinbosari J. Kazbekovning Biologik xilma-xillik to‘g‘risidagi Konventsiya Ijrochi kotibi o‘rinbosari Devid Kuper bilan videokonferents-aloqa shaklidagi muzokaralari tashkil etildi.

Onlayn uchrashuv O‘zbekistonning Nyu-Yorkdagi doimiy vakolatxonasi rahbari B. Ibragimov ishtirokida bo‘lib o‘tdi.

Muzokaralar davomida xorijiy tomonga O‘zbekiston Hukumati tomonidan bioxilma-xillikni asrash, muhofaza etiladigan tabiiy hududlarni kengaytirish va boshqarish, Orol dengizi qurigan tubida o‘rmonzorlar barpo etish kabi masalalar yuzasidan fikr almashildi. Muhokamalar davomida tomonlar Biologik xilma-xillik to‘g‘risidagi Konventsiya bilan hamkorlikda amalga oshiriladigan chora-tadbirlar va uning tadbirlarida O‘zbekiston vakillarining ishtiroki masalalariga to‘xtalib o‘tildi.

Shuningdek, Konventsiya tomonlarining keyingi Konferentsiyalaridan birini hamda boshqa organlarining yig‘ilishlarini O‘zbekistonda o‘tkazish imkoniyati muhokama qilindi.

Davlat ekologiya qo‘mitasi
Matbuot xizmati