Тошкентда «Покиза инсонлар» акцияси давом этмоқда
21.
01. 2020
17:03
5101
Новости

Ижтимоий фаол бир гуруҳ юртдошларимиз томонидан ташкил этилган «Покиза инсонлар» акцияси хайрли ишлардан ҳисобланади.
Тошкент шаҳрида ўтказилаётган акция иштирокчилари ҳар пайшанба куни белгилаб олинган битта тумандаги ободонлаштириш ходимлари ишлаб турган жойга бориб, уларга миннатдорлик билдириб, хушкайфият улашишади. Ўзлари билан олиб келган иссиқ қаҳва, егулик ва қўлқопларни ҳадя қилишади.

Акциянинг бу галги ҳафталиги Яшнобод туманида бўлиб ўтди.

Шавкат Ҳасан, акция фаолларидан:
– Қиладиган ишимиз уларнинг ёнига бориб, уларга озгина эътибор қаратиш, бир оз бўлса-да улар меҳнатини қадрлаш ва эътироф этиш. Акцияга йиғилган кишилар бир-бирини мутлақо танимайди ва шу ишга бирлашган. Бундан ташқари, бевосита йўлларда юриб, совға улашмасдан ҳам «Покиза инсонлар» акциясида иштирок этиш мумкин. Бунинг учун шунчаки, кўчаларга ахлат ташламасликнинг ўзи кифоя.

Ақида Махирова, акциянинг яна бир фаоли:
– Сариқ нимча кийган бу инсонлар бизнинг «иккинчи армиямиз». Улар – «сариқ нимчалилар» покизалигимиз, озодалигимизни таъминлашади.

Бу акция нафақат Тошкент, балки бошқа вилоятлар шаҳарларига ҳам кенг ёйилди. Масалан, Самарқанд, Нукус, Фарғона, Андижон, Наманган, Сирдарё... Юртдошларимизни ушбу хайрли ишга бош қўшишларини сўраб қолардик. Келинглар, шу инсонларнинг меҳнатини қадрлаб, улар қалбига озгина илиқлик олиб кирайлик.

 


Давлат экология қўмитаси
Ахборот хизмати

 


Полезные ресурсы